One Clean Party ni Garcia suportado sa Norte

CEBU, Philippines – Subling mipadayag sa ilang hugot nga suporta kang Gobernador Gwendolyn Garcia sa One Cebu Party ang mga opisyales sa mga lungsod sa Isla sa Bantayan alang sa umaabot nga piniliay sa sunod tuig.

Kining maong pasalig gihimo sa maong mga opisyal sa lungsod sa Bantayan, Sta Fe ug Madridejos ngadto sa gobernadora sa usa ka salo-salo atol sa Palawod Festival niadtong Lunes sa Bantayan.

Si Mayor Geralyn Escario sa lungsod sa Bantayan nagkanayon nga dili gyud molubad ang iyang suporta sa administrasyon ni Garcia tungod kay nakita niya ug sa taga Bantayanon ang kalamboan sa ilang lungsod gumikan sa mga proyekto nga gibubo sa ilang dapit sa gobernador.

Gani mipadayag ang mayor nga wala siya magmahay nga mibiya siya sa kampo sa pamilyang Martinez ug mitapon sa partido ni Garcia

Samtang si Bise Mayor Adoracion Cabrera sa lungsod sa Sta. Fe nagkanayon nga magpabiling lig-on ang iyang suporta sa gobernadora kay nahimo siyang bise mayor karon tungod sa tabang sa gobernadora kaniya.

Si Salvador “Sally” dela Fuentes, mayor sa Madridejos miingon usab nga ilang ibuhos ang suporta ngadto sa kasamtangang administrasyon tungod kay wala magkulang kanila ang gobernadora paghatag sa ilang gikinahanglan.

Sa laing bahin, si Kongresista Benhur Salimbangon sa ikaupat nga distrito sa lalawigan nagtuo nga wala nay makatarog pa nga laing partido sa One Cebu Party nga gipangulohan ni Garcia.

Si Salimbangon usa usab sa pinasidunggang dinapit atol sa nahisgutang Palawod Festival. – Rey Pasaporte ug Chester Abadilla (BANAT NEWS)