Curfew ordinance para sa minor sa Lapu ipatuman

CEBU, Philippines – Seryosong implementasyon sa "Curfew Ordinance for Minors" sa dakbayan sa Lapulapu ipaabot hangtod ngadto sa kabarangayan kini buot nga maoy mahitabo ni Lapulapu City ABC president ug Barangay Kapitan sa Pajo, Leo Mercado.

Si Mercado sa pakighinabi sa Banat News mibutyag nga naaprubahan sa regular session sa Konseho sa dakbayan sa Lapulapu ang Curfew Ordinance for Minors nga gipangamahanan nila ni Konsehal Efren Herrera ug SK Federation President Reymar Deco.

Ang Association of Barangay Captains maoy moabag sa implementasyon niini nga ang katuyoan mao ang pagwagtang o ang pagpamenus sa krimen sa dakbayan nga gikalambigitan sa mga batan-on nga nagpangidaron 18 anyos paubos. Kasagaran sa mga mabiktima sa krimen mao kadtong mga batan-ong sakop sa gang ug fraternity.

Ang mga minor de edad nga maglaroylaroy sa dakbayan sa Lapulapu sikupon pag-abot sa alas 11 sa kagabhion hangtod sa alas-4 sa kaadlawon ug ang madakpan adto dad-on sa DSWD sa dakbayan.

Di sila buhian hangtud di pangunayan sa ilang mga ginikanan ang pagkuha kanila.

Ang mga barangay kapitan gimanduan ni Mercado nga ipatuman ang ordinansa karong bulana

Ang kapolisan sa dakbayan sa Lapulapu mipadayag nga maghuwat lamang sila sa pormal nga implementasyon sa maong ordinansa sa dili pa sila mohimo og operasyon kalabot niini. – Bong Soriano (BANAT NEWS)