Ambush 'nakapaukay' sa tawo

CEBU, Philippines – Naukay ang kapolisan sa lalawigan sa Sugbo ingon man kapulisan sa dakbayan sa Sugbu lakip na mga asawa sa mga polis tungod sa report nga gi-ambush kagahapon sa buntag ang mga trainees sa barangay Gaas, lungsod sa Balamban.

Dunay 50 ka mga trainees ug 15 ka staff sa Senior Police Officer Public Safety Leadership Course sayo kagahapon sa buntag diha sa Regional Training School sa barangay Gaas.

Kabahin sa maong training ang lima ka klaseng mga scenario nga naglakip sa scenario nga ambush nga kinahanglang mogamit og pabuto o pagpabuto og armas.

Gikatahong dunay usa ka wala mailhing asawa sa usa ka polis nga nag-training sa RTS nanawag sa usa ka police unit kagahapong adlawa ug nangayog tabang kay gi-ambush ang grupo sa iyang bana sa Gaas.

Hinungdan nga na-alarma usab ang mga sakop sa media nga ni-coordinate sa mga local nga opisyal, official sa militar ug sa kapulisan sa pagtino kun unsa ka tinuod ang maong report.

Ang Cebu City Police Office ug Balamban Police Station daling nangandam aron pag-reinforce sa “gi-ambush” nga mga kauban.

Mismong si Mayor Alex Binghay nga gihinabi sa DySS kagahapon mibutyag nga iyaha gyung gipaadtoan og mga polis ang dapit aron pagsusi sa hitabo ug nasutang di diay kini tinuod.

Si Sr. Insp. Ramon Landingin, usa sa mga trainor sa RTS-7 miingon nga dunay approval sa Police Regional Office (PRO-7) ang ilang scenarios, apan aron makasiguro gihunong gyud ang scenario ug nag-head count ang tropa ug nasutang kumpleto ang mga trainees.

Matud pa niya nagpabuto sila sa mga ambush site apan mga fire crackers ra kini, gikumpirmar sa mga residente nga nakadungog gyud sila og mga buto sa dapit.

Nasuta nga duna diay usa sa mga police trainee nga nakig-estorya sa cellphone sa iyang asawa apan tungod kay hinay ang signal naputol-putol kini ug nadunggan usab sa pagbuto-buto ang maong polis giingong mipahibalo sa asawa nga naa pa siya tunga-tunga sa ilang ambush scenario.

Nagtuo silang posibleng ang pulong “ambush” ra maoy nadunggan sa maong ginang ug ingon man ang buto-buto maong wala kini mahimutang ug nanawag sa mga awtoridad aron marespondehan ang ambush. – BANAT NEWS