Usa sa suspek ni Osorio nasikop na

CEBU, Philippines – Gi-aresto sa kapolisan sa dakbayan sa Sugbo kagahapon sa udto si Allan Senogat human malutsi sa warrant of arrest sa kasong murder sa kalambigitan sa pagpusil patay ni Assistant City Prosecutor Patrick Brian Osorio niadtong Enero 6 ning tuiga diha sa Gochan Street barangay Mambaling.

Si Senogat gidakop nila ni Insp. Vicente Velasquez, hepe sa homicide section sa Cebu City Police Office (CCPO) diha sa buhatan sa Criminal Investigation and Detection Group (CIDG-7) pinasikad sa warrant of arrest nga giisyu ni Judge Silvestre Maamo Jr. sa Regional Trial Court (RTC) Branch 17.

Si Sr. Supt. Patrocinio Comendador nagkanayon nga sulbad na ang kasong pagpusil patay kang piskal Osorio human masikop si Senogat dihang migawas ang warrant of arrest gikan sa korte kagahapong adlawa.

Matud pa ni Comendador nga ang ubang mga pangutana labot na sa mga ebidensya adto nalang unya kini nila sa korte tubagon human ilang napasaka ang kaso batok sa mga suspek nga sila si Senogat ug Lyndon Horandoy diin ilaha pang gipaabot nga ipagawas usab sa korte ang warrant of arrest niini.

Gipadayag niini nga usa ka maayong kalambuan sa kaso ni Osorio ang pagkasikop na sa hingpit ni Senogat nga nagpakita nga naglihok ang kaso batok sa mga supek human sa pipila ka bulan nilang pagpalig-on sa mga ebidensiya.

Iyang giklaro nga joint operation kini nila sa CIDG-7 nga kabahin usab sa “Task Force Osorio” bisan tuod kun si Senogat ang una nang mipadangat og komunikasyon ngadto sa kapolisan nga mo-surrender kun dunay warrant of arrest nga mogawas gikan sa korte batok kaniya.

Kagahapon sa hapon si Senogat gidala sa mga sakop sa homicide section ngadto na sa korte alang na sa pagkuha’g commitment order pagbalhog na niini ngadto na sa bilanggoan sa Cebu City Jail diha sa barangay Kalunasan.

Ang akusadong si Senogat nga nahinabi sa mga sakop sa media pabiling ni-insister nga inosente sa maong krimin ug mipasalig nga iyang atubangon ang kasong murder nga ipasaka batok kaniya ug dili gyud niini sibogan.

Masaligon usab siya sa iyang kaugalingon nga makalingkawas sa maong kaso.

Gipadayag niini nga niadto pa usab siyang Enero nagbalik-balik sa kapolisan sa dakbayan sa Sugbo aron paglimpiyo sa iyang pangalan batok sa mga pasangil kaniya.

Matud niini nga gikasubo niya ang maong hitabo apan siya ug ang pamilya ni Osorio pulos mga nabiktima sa kaso.

Hinungdan nga iyang gi-awhag ang saksi sa maong kaso nga barugan ang mga giluwatang pamahayag niini apan siya sa iyang bahin masaligon nga makalingkawas sa maong pasangil ngadto kaniya.

Kahinumduman nga si Senogat maoy gitudlo sa mga saksi sa kapolisan sa dakbayan sa Sugbo nga maoy nagmaneho sa motorsiklo nga gisakyan sa trigger man nga si Horandoy dihang gi-ambusan nila si piskal Osorio dihang mopauli na unta kini sa ilang panimalay diha sa lungsod sa Minglanilla.

Unang nadakpan si Senogat sa CIDG-7 niadtong milabay'ng bulan gumikan sa kalambigitan niini sa krimin pagpatay sa usa ka konsehal diha sa barangay Maghaway dakbayan sa Talisay apan nakagawas human maka-piyansa.

Ang kapolisan misusi na usab sa mga nanggawas nga report nga si Senogat usa kini ka gun for hire apan una nang gipanghimakak kini sa suspek. – BANAT NEWS