CEBU, Philippines – Anaa karon sa 'seryoso' nga kondisyon si kanhi Presidente Corazon "Cory" Aquino human siya ma-admit sa ospital niadtong miaging semana.
Kagahapon lamang gikonpirmar sa mga higala ug supporters sa kanhi presidente ang iyang kahimtang human sa siyam ka adlaw nga healing mass sa Greenbelt Chapel sa dakbayan sa Makati. Si kanhi Senador Franklin Drilon mitug-an kagahapon sa iyang kondisyon.
Si Margie Juico, social secretary ni Cory nga miplano sa novena, nagkanayon nga seryoso na ang kondisyon sa kanhi presidente, apan gihangyo niya ang publiko sa pag-ampo alang sa iyang kaayuhan.
Si Juico nagkanayon nga sa wala pa ma-admit sa ospital, si Aquino miingon kanila nga kun siya'y papilion buot niyang "being with Ninoy," ang iyang bana nga si anhing Senador Benigno Aquino.
Apan matud sa kanhi presidente nga padayon siyang nakig-away sa kanser alang sa iyang mga anak.
Si Korina Sanchez nagkanayon nga ang labing importante karon nga mag-ampo ang mga Pilipino alang sa kanhi presidente ug dili angay panumbalingon ang iyang kondisyon.
Si Cory gipili ni Korina ug ni Senador Mar Roxas nga maoy usa sa ilang ninang sa ilang umaabot nga kasal. – John Rey Saavedra (BANAT NEWS)