P254 milyones nga supplemental budget sa Mandaue tukion

CEBU, Philippines – Ang P254 milyones nga supplemental budget nga giandam sa buhatan ni Mayor Jonas Cortes gikatakdang tukion sa regular nga session sa konseho sa dakbayan sa Mandaue sa sunod semana.

Nahilakip sa maong supplemental budget ang usbaw sa suholan sa mga job orders, mga kawani sa city hall nga nagsuweldo og P235 ngadto na sa P265.

Samtang makadawat usab og tag P100,000 ang matag barangay kapitan sa 27 ka barangay sa dakbayan aron ipamalit nila og dump truck ug ipanukod og Material Recovery Facilities (MRF) alang sa pagbinahigay sa ilang mga basura.

Dugang nga gilakip sa maong supplemental budget mao ang P5,000 nga Charter Day Anniversary Bonus alang sa 573 ka mga regular, mga co-terminus nga mga kawani ug mga piniling opisyal sa kagamhanan sa maong dakbayan.

Si Konsehal Emiliano Rosal, chairman sa committee on budget and appropriation sa dakbayan nga nahinabi sa Banat News miingon nga mohimo pa siya og pagtuon sa maong supplemental budget nga giduso sa mayor.

Giklaro niya nga ang pagpausbaw sa matag adlaw nga suweldo sa mga kawani ug mga job orders nalatid na sa ilang giaprobahan nga ordinansa.

Dugang pa niya nga ilang gilakip sa umento sa suweldo ang mga job orders sanglit nasuta nila nga dugay na nga mga katuigan nga wala malakip sa inumentohay sa suhol ang maong mga kawani. – Romeo T. Limpangog (BANAT NEWS)