Tulo ka tawo giluba angol

CEBU, Philippines – Samdan ang tulo ka tawo dihang gipangluba kini didto sa sitio Ampalaya , barangay Gun-ob, dakbayan sa Lapulapu sa miaging gabii.

Ang mga biktima mao sila si Julius Fernandez, 23, Ariel Herda, 23 ug Dionisio Baguio, hingkod, nga pulos ulitawo ug nagpuyo sa maong dapit.

Si SPO3 Candido Berengue sa Lapulapu Police Station miingon nga nag-inom ang tulo sa usa ka tindahan sa maong dapit ug dihang nangalasbag na, nagkalalis. Si Baguio nga wala makaagwanta mipauli sa ilang balay ug sa pagbalik niini nagdala na og kutsilyo.

Dihadiha gipang-hansakan dayon niini ang mga tiyan sa duha niya ka kauban nga sila si Fernandez ug Herda

Apan samtang gipangluba niya ang duha , midasmag usab ang mga estambay sa maong dapit ug wala na masayri kun kinsay nakadunggab kang Baguio. Hinuon nalibre ra ang tulo kay nadala man dayon sa tambalanan. – Romeo T. Limpangog (BANAT NEWS)