Comelec-7 andam mobalik sa mano-mano

CEBU, Philippines – Andam gihapon ang Comelec-7 sa pagbalik sa manual nga election sa sunod nga tuig kung gikinahanglan tungod sa pag-atras sa Filipino partner nga kasosyo sa Smartmatic International –Total Information Management Corporation nga maoy nakadaug sa bidding sa Comelec alang sa full automation sa elections tuig 2010.

Ang Total Information Management Corporation nga maoy Filipino partner sa Smartmatic International misibog sa ilang kasabutan nga maoy mo-supply, mo-train sa mga staffs alang sa 82,200 ka precinct count optican scan machines gumikan sa kasungiang lisod hiluton.

Sumala pa ni Comelec-7 regional director Rene Rey Buac andam sila kanunay sa pagpahigayon sa naandang mano-manong presidential election.

Apan iyang gitataw nga maapektohan gyud ang nagpadayong training ug ingon man ang pag-edukar sa mga botante tungod kay lahi na man usab ang gamiton nga machine alang sa manual nga election.

Hinuon iyang gitataw nga may igo pang panahon sa pagpreparar apan iyang gitataw nga dili gihapon mawala ang pagduda sa mga mapildi nga gitikasan kay dili kalikayan nga makalusot ang dagdag-bawas sa karaan nga pamaagi.

Samtang si Comelec Chairman Jose Melo nga nahinabi sa DyRF nagkanayon nga ilang tun-an kun gitugot ba sa balaod nga ang Comelec maoy makig-partner sa Smartmatic Consortium aron madayon ang computerized election sa sunod tuig.

Kini bisan gamay kaayo ang tsansang molampus sila sa maong lakang ug posibleng ang pundo nga gihatag sa Kongreso alang sa poll automation hayan mabalik sa national government.

Si provincial election supervisor Lionel Marco Castillano sa pakighinabi sa Banat News miangkong nakurat sila sa maong balita apan kung wala nay laing mahimo hayan mobalik sila sa kinaraang paagi sa eleksyon.

Apan si City Election Officer Marchel Sarno sa iyang bahin nagkanayon nga mas komportable siyang ang naandang pamaagi maoy gamiton karon gumikan kay di pa sinati sa ilang ahensya ang pamaagi sa automated polls samtang sa mano-mano sinati na nila kaayo. - Chester Abadilla uban sa report ni Elly Bolonos (BANAT NEWS)