Usik lang sa panahon - NBI

CEBU, Philippines – “It’s a waste of time and exercise in futility.” Kini maoy pamahayag sa medico legal officer sa National Bureau of Investigation sa Central Visayas kabahin sa pagpaugkat pag-usab sa 36 ka wala pa mailhing patay'ng lawas nga gituohang biktima sa nalunod nga MV Princess of the Stars aron lang sa pathological ug anthropological examinations aron pag-ila kanila.

Si Dr. Rene Cam, nga usa sa mga sakop sa NBI Disaster Victims Identification team nga mikuha’g mga samples alang sa DNA testing sa mga biktima usa ka tuig na ang nakalabay nagkanayon nga ang pamaaging gustong buhaton karon sa independent forensic group nga gikuha sa Public Attorney’s Office ug mga kabanay sa missing nga mga pasahero ug tripulante gibuhat na nila kaniadto pa.

“Kanang ilang buhaton karon gibuhat na pod na namo,” matud pa ni Cam sa The Freeman.

Si Cam mi-esplikar nga ang anthropology dunay kaugalingong limitasyon ilabi na sa kasamtangang itsura karon sa mga patay'ng lawas nga nangadugta na, matud pa niya nga kung bukog nalang ang tawo hanap nang mailhan sa susamang pamaagi (anthropology).

Iyang gipasabot nga ang bukog sa tawo makatabang pag-ila kun babaye o lalaki ba kini apan di kini makatabang pag-ila kung si Juan dela Cruz ba kini o si kinsa. Matud pang Cam ang NBI-DVI team naglisod pagkuha og samples sa maong mga patay'ng lawas gumikan sa kahimtang na niini maong migamit sila sa Deoxyribonucleic Acid (DNA) matching.

Ang DNA matching maoy labing modernong pamaagi sa siyensya pag-ila sa mga nangadugta o nadunot nang patay'ng lawas partikular na sa mga disaster victims kay sagad kanila nangadugta na kun maugkat.

Si Cebu City Councilor Gerardo Carillo, nga nakakita sa pamaagi sa NBI-DVI inabagan sa International Commission for Missing Person sa International Police sa DNA process nagkanayon nga di makatarunganon ug misleading ang pamahayag sa PAO nga DNA matching lang maoy gihimo sa NBI ug Interpol.

Matud pa niya nga ang grupo migamit sa medical ug dental records sa mga missing nga pasahero aron pag-ila kanila. Hinuon gitahod ni Carillo ang gibating kaguol sa mga kabanay kansang mga mahal sa kinabuhi wala pa gihapon mahatagi og desenteng lubong.

Miklaro hinuon siyang dili na makapaabot og financial assistance gikan sa dakbayan ang mga kabanay tungod kay nabuhat na niini ang ilang obligasyon sa dihang gihimo ang DNA testing ug uban pang proseso aron matabangan ang mga kabanay sa biktima.

Samtang kinahanglang sundon sa buot mougkat sa mga patay diha sa Carreta Cemetery ang tanang rekisitos sama sa health ug sanitation requirements sa dakbayan, kinahanglang mosumitir ang grupo ni Professor Jerome Bailen sa ilang plano kung unsang proseso ang ilang himuon aron maaprubahan sa dakbayan.

Kahinumduman nga si Regional Trial Court Branch 10 Judge Soliver Peras mitugot niadtong Lunes sa ex-party motion sa PAO nga ugkaton og balik ang 36 nga patay'ng lawas sa Carreta alang sa eksaminasyon sa independent forensic group aron sila mailhan. – Edwin Ian Melecio ug Fred Languido (BANAT NEWS)