Pugante sa Ronda wa kit-i

CEBU, Philippines – Naluya na og pinangitaay ang kapolisan sa lungsod sa Ronda sa usa ka piniriso nga mipoga gikan sa ilang bilanggoan niadtong Sabado sa kaadlawon busa gikonklusyonan nila kining nakalayas na og layo nga dapit.

Si PO3 Emirito Sansan, imbistigador sa Ronda Police Station mibutyag sa Banat News  nga gilibot na nila karon ang mga kasikbit nga lungsod sa habagatan sa pamasin nga madakpan og balik si Jureven Tobis alyas Jury.

Si Tobis kinsa nag-atubang og kasong frustrated homicide ug attempted murder nakaiskapo human gub-a niini ang bongbong sa luyong bahin sa selda sa prisohan.

Hinuon ang giilisang jailer nga si PO1 Roman Canete adto na sa Pilar Police Station sa Camotes island ug misugod na usab og duty ang gihulip niya kagahapon nga si PO2 Socrates Avila nga gikan sa Cebu Police Provincial Office (CPPO).

Kauban ni Canete nga ilabay ngadto sa Pilar mao si PO2 Wilson Garciano sa Danao Police Station kinsa naeskapohan usab og piniriso nga 17 anyos sa milabay’ng semana apan nadakpan og balik. – Darrel A. Carumba (BANAT NEWS)


Show comments