Mag-uuma napalgang nagbitay sa mangga

CEBU, Philippines – Nagbitay sa kaugalingong tinanom nga mangga ang usa ka mag-uuma nga gituohang naghikog sa wala pa masayring hinungdan pasado alas 6 sa buntag dapit sa ilang panimalay sa sitio Lower Guba ning dakbayan.

Si Louise Penecitos, 45, naabtan sa iyang ka live-in nga si Nene Jalipa nga nagbitay sa punoan sa maong prutas gamit ang usa ka pisi.

Sa imbestigasyon sa kapolisan base usab sa gitug-an ni Jalipa buntag pa sayo wala na igkita si Penecitos nianang kaadlawon hangtud nga nabuntagan nalang wala kini mobalik sa ilang balay.

Hinungdan nga dihang misubang na ang adlaw gipangita niya kini sa palibot ug diha nalang niya makit-ing nagbitay na sa usa sa mga punoan sa ilang tinanom nga mangga gibana-banang 50-60 metros ang gilay-on gikan sa ilang panimalay.

 Matud pa ni Jalipa nianang milabay'ng gabii nag-estorya pa sila bahin sa kahimtang sa ilang pamilya apan wala gayud kini naghisgot nga magpakamatay o nagpakita og mga senyales nga mao kini iyang buhaton.

Pasado alas dos sa kadlawon nakamata siya aron patutyon ang ilang anak nga tulo pa ka buwan, gikatingala nalang niyang wala na sa iyang tupad ang iyang bana ug nianang pagkabuntag patay na kini.

Matod pa ni SPO1 Henry Orbiso sa Cebu City Police Office, Homicide Section nagkanayon sa pakighinabi sa Banat News nga ilang pagduda nga posibleng problemang pinansyal ang hinungdan sa paghikog niini tungod kay ang iyang ka live-in niini bag-ohay lang nga nagpa-opera sa tutoy tungod sa sakit nga breast cancer. – Lesley Caminade (BANAT NEWS)