Flower vendors sa sidewalk papahawaon sa Market Authority

CEBU, Philippines – Papahawaon na sa ilang mga pwesto ang gatusan ka mga manindahay og buwak diha sa dalan Magallanes, Calderon ug Escaño ning siyudad sa Sugbu ugmang adlawa.

Kini tungod usab sa mga reklamo nga nadawat sa City Market Authority gikan sa lehitimong mga flower vendors diha sa Freedom Park nga nalupigan og halin gumikan sa mga ilegal nga naninda og buwak sa maong dapit.

Giklaro hinuon ni City Market Administrator Racquel Bohol-Arce nga ilang hatagan og pwesto ang apektadong mga manindahay diha sa sulod nga bahin sa Freedom Park, ang maong suhestiyon daan nang gisupak sa nahisgutang mga flower vendors.

“Nangreklamo man gud ang atong legitimate stallholders kay wala na kuno sila'y halin kay masangit ang mamalit ba diha sa dalan,” sumala ni Arce.

Nasayran nga nihangyo na ang nahisgutang mga manindahay ngadto kang Mayor Tomas Osmeña nga magpabilin sa ilang mga pwesto, apan walay nadawat nga pasidaan gikan sa mayor si Arce kabahin niini maong iyahang ipadayon ang pagpahawa kanila.

Niingon si Arce nga kadtong mga manindahay nga magdumili sa pagbalhin dili na hatagan og pwesto sa merkado ug posibleng mahunong sa ilang pagpaninda.

“Og dili sila mamalhin, kung magmagahi gyud sila sa ilang ulo, aw, wala na silay katindahan, they can vend sa sulod sa Freedom pero dili sa gawas,” matud pa ni Arce.

Gipadayag sa market administrator nga gusto lang niya nga mahapsay ang kamerkaduhan sa dakbayan pinaagi sa pagpatuman og mga kausaban. – Elly Bolonos (BANAT NEWS)