Anti-rabbies Act higpit ipatuman

CEBU, Philippines – Gipul-an na ang Department of Veterinary Medicine and Fisheries (DVMF) sa kagamhanan sa dakbayan sa Sugbu sa pagsige og awhag ngadto sa mga pet owners sa siyudad pagparehistro sa ilang mga binuhing iro.

Naobserbahan sa labaw sa DVMF nga si Doctor Alice Utlang nga gibaliwala lang sa ubang namuhi og iro ang ilang panawagan ug agi og leksyon higpitan nila pagpatuman ang Akta Republika 9482 kon ang Anti-Rabies Act of 2007 aron patagmon ang mga pet owners.

Base sa maong balaud, kadtong mga tawo nga magdumili pagparehistro ug pagpabakuna sa ilang binuhing iro mahimong mamultahan og P2,000.

Samtang ang mga pet owners nga dili mobutang og leash (hikot) sa ilang iro kun kini dalhon gawas sa balay pamultahon usab og P500; P500 ngadto sa P1,000 usab ang lukat sa matag iro nga ma-impound.

Mas dako ang ipahamtang nga multa niadtong nanag-iya’g iro nga walay bakuna kung kini makapaak og tawo gawas nga paabagahon sa galastuhan pagpatambal sa biktima.

Subling gipahimangnoan ni Utlang ang mga pet owners sa siyudad nga iparehistro na ang ilang mga binuhing iro diha sa ilang barangay nga nagkinahanglan lang og P150 nga registration fee sa matag iro, ug libre na ang anti-rabies vaccine ingon man sa dog tag timailhan sa iro nga nabakunahan. – Elly Bolonos (BANAT NEWS)