Nagdala'g granada gipatay sa uyoan

CEBU, Philippines – Gipusil-patay sa kaugalingong uyoan ang pag-umangkong giingong nagbitbit og granada atol sa ilang init nga panaglalis sa Poblacion Ward-4 lungsod sa Minglanilla niadtong Sabado sa alas 11:00 sa gabii.

Ang biktima mao si Rex Howard Reyes, 29, molupyo sa maong lugar samtang ang suspek mao ra ang iyang uyoang si Antonio Reyes, molupyo sa maong lugar.

Matud pa ni PO3 Rolland Camillo sa Minglanilla Police dihang nahinabi sa Banat News nga gipusil sa ulo sa iyang uyoan ang biktima sa gawas sa ilang pinuy-anan.

Dihang nangabot ang mga polis may nakuhang granada diha sa posesyon sa biktima apan nakasibat na ang suspek ug padayon pa karong gipangita sa kapulisan.

Subay sa imbestigasyon sa kapolisan nagkalalis ang duha sa wala pa matinong hinungdan ug misampot sa pagpamusil nga miresulta sa kamatayon sa pag-umangkon.

Dugang nahipos nga impormasyon sa kapolisan giingong badlungon ang biktima sa maong lugar ug kanunay nga makabingkil sa suspek matag panahon nga kini badlungon.

Matud pa sa pipila ka mga nakasaksi nga mitug-an sa kapolisan pipila ka minutos una pa mapusili ang biktima gikatahong nakit-an kining nagbitbit og granada. – Darrel Carumba (BANAT NEWS)