1T kapin ka marijuana gilarot

CEBU, Philippines -  Sobra sa usa ka libong punoan sa Marijuana ang gipanglarot sa kapulisan human madiskubrehi ang usa ka plantasyon niini sa bukirang bahin sa sitio Tayong, barangay Vito, lungsod sa Balamban niadtong Sabado sa alas 2:00 sa hapon.

Ang kapulisan sa Balamban pinangulohan sa hepe niini nga si Chief Insp. Resty Santos daling nipahigayon og operasyon human makadawat og impormasyon kabahin sa plantasyon sa Marijuana sa maong lugar.

Matud pa ni SPO3 Allan Patalingjug sa Balamban Police dihang nahinabi sa Banat News, muabot og 804 ka mga fully-grown Marijuana ang ilang naibot wala pay labot sa laing 250 ka buok nga mga bag-ong tanom.

Wala madakpi ang nanag-iya o nagtanum sa maong mga Marijuana apan na-recover ang usa ka gallon nga plastic ug balde nga gisudlan og mga abuno nga gituohang gibiyaan human nakamatikod ang nananom nga dunay mangabot nga mga polis.

Nasuta sa kapulisan nga usa ka timberland ang maong lugar nga buot ipasabot gipanag-iya sa gobiyerno ang luna.

Niadtong milabay'ng semana usa usab ka plantasyon sa marijuana ang gipang-ibot sa kapulisan ug PDEA-7 sa barangay Bayong sakop gihapon sa maong lungsod. - BANAT NEWS