Dalagita gi-gangrape sa kauban

CEBU, Philippines -  Usa ka 16-anyos nga graduating nga tinun-an sa usa ka pampublikong high school sa lungsod sa Argao ang gikatahong gitabangan og lugos sa lima ka menor de edad pipila ka oras human sa ilang pag-tree planting niadtong milabay'ng adlaw'ng Sabado.

Giingong nahitabo ang pagpanglugos gumikan kay pulos na sila mga hubog tungod kay nagkasabot nga mag-inom pagkahuman sa ilang tree-planting activity sa ilang tunghaan.

Usa sa mga gipasanginlang milugos sa dalagita nagtingkagol na sa karsel sa Argao Police Station nga giilang si Randy Estudillo, 19, nga kanhi tinun-an sa samang tunghaan diin magtungha ang biktima ug molupyo sa nahitaboan.

Ang kapolisan nagdumili sa pagbutyag og impormasyon kabahin sa nahitabo lakip na ang giingong pag-gang rape sa dalagita sanglit nagpadayon pa ang ilang imbestigasyon sa maong kaso.

Apan usa ka maestra (ngalan gitago sa Banat News) sa maong tunghaan ang nahinabi sa Banat News nagkanayon nga dunay tunga sa adlaw'ng tree-planting activity nga gipahigayon sa ilang tunghaan niadtong Sabado subay sa memorandum sa Department of Education.

Matud pa sa maong magtutudlo, ang tanang mga batang miapil sa tree-planting duna gyu'y parents consent ug human sa kalihukan namauli ang mga estudyante apan base sa nakuha niyang impormasyon, ang biktima ug mga kabarkada lakip na ang usa ka tomboy nagsabot nga mangaligo sa dagat inig ka human sa ilang tree-planting.

Samtang si Estudillo sa pakighinabi sa Banat News kagahapon mihimakak sa pasangil nga apil sa milugos sa biktima. Matud pa niya nga pasado alas dose sa udto miabot siya sa nahisgutang lugar ug iyang naabtan ang maong dalagita kuyog ang ubang batan-on lakip na ang tomboy nga pulos na hubog. Matud pa niya namatikdan niyang daghang mga gidudahang tsikinini ang biktima ug gipunayan sad og halok sa mga kauban.

Miangkon hinuon siyang miapil gyud siya paghalok-halok nga iya usab giangkong dakong kasaypanan nga iyang nabuhat apan mihimakak siyang dunay nahitabong gang rape.

Ang magtutudlo midugang nga usa sa iyang mga estudyanteng lalaking menor pa usab ang edad mao nay mikuha sa biktima ug mihatud kaniya sa ilang panimalay nianang pagkahapon.

Nianang pagka alas-6 sa hapon ang biktima ug ang maguwang niini midangop sa kapolisan ug misumbong nga gitabangan og lugos ang iyang manghod sa mga kaubang mga batan-on.

Ang kapolisan sa Argao modakop unta sa mga gipanganlang responsable sa paglugos sa dalagita apan bugtong si Estudillo lang maoy nasikop diha sa ilang panimalay.

Gipaabot pa sa kapolisan ang resulta sa medical examination sa dalagita.  - BANAT NEWS