Biktima sa bagyo tabangan sa Kapitolyo

CEBU, Philippines – Giandam na sa kagamhanan sa lalawigan sa Sugbu ang hinabang niini alang sa nabiktima sa bagyong Feria didto sa lungsod sa Bantayan Island ug sa Santa Fe sa isla sa Bantayan.

Si Provincial Social Welfare officer Marivic Garces nagkanayon nga gimandoan siya ni Governor Gwen Garcia nga pahatagan og P5 mil ang pamilya ni Vicente Liyagie, 70, minyo, mangingisda , nga taga Daanbantayan kinsa namatay dihang napantok sa bato ang iyang ulo dihang nabuwag siya sa iyang sakayang nalunod kay gibagnos sa mga higanteng bawod atol sa bagyo.

Samtang si Regional Disaster Coordinating Council operations Chief, Niel Sanchez nagkanayon nga mohatag usab sila og P10 mil sa pamilyang Leyagie , P5 mil usab alang kang Domingo Illustrisimo, 69, minyo, nga taga Marikaban, Santa Fe, kinsa natumbahan sa punoan sa lubi gumikan sa maong bagyo. – Chester Abadilla (BANAT NEWS)