Sibonga police imbestigahon

CEBU, Philippines – Gitakdang ipaimbistigar ni Sr. Supt. Jesus Gacquing , director sa Cebu Provincial Police Office (CPPO)ang kapulisan sa Sibonga gumikan sa dili maayong pamatasan niini.

Kini maoy gipadayag ni Gacquing, human niya hisayri nga ang kapolisan sa Sibonga Police Station dili magtarong sa pagtubag sa telepono ug puwerti sab mga taspokana niini sa paghatag og spot report sa mga insidenti sa nahisgutang dapit.

Si Gacquing, mipasabot nga ang walay batasan nga polis silotan gyud tungod kay duna nay memorandum bahin niini kauban usab kadtong dili mohatag og spot report sa mga panghitabo sa kalungsoran.

Mihimo si Gacquing sa maong lakang dihang nasayran niini nga ang kapolisan sa Sibonga dili gyud manubag sa tawag sa telepono ilabi na kun taga media ang motawag kanila.

Gipadayag ni Gacquing nga ang media ug publiko kaabag kini pagpatunhay sa kahapsay ug kalinaw busa tarungon kini pagtratar sa kapulisan. – Guam P. Logroño (BANAT NEWS)