Babayeng drug pusher nasikop sa kapolisan

CEBU, Philippines – Usa ka babaye nga suspetsadong pusher og shabu nasikop sa kapolisan sa dakbayan sa Talisay didto sa sitio Tunga, barangay Tanke, kagahapon sa buntag.

Ang suspetsado giila sa kapolisan nga si Elsa Cabantugan, 43, minyo, nga taga Tunga, Tangke.

Si Superintendent Henry Binas, hepe sa Talisay City Police Station mibutyag sa Banat News kagahapon nga si Cabantugan kinsa nagkagulkol na karon sa prisohan usa ka tindera og isda apan napatik na siya sa“ watch list” sa kapolisan sa dakbayan ug gipanid-an na kini sulod sa duha ka semana una rondaha sa kapolisan.

Matud pa ni Binas nga ang kapolisang mironda sa panimalay ni Cabantugan gipangunahan ni Sr. Inspector Isagani Abalo ubos sa koordinasyon sa mga sakop sa Philippine Drug Enforcement Agency (PDEA).

Dala sa kapolisan sa pagronda sa balay ni Cabantugan mao ang search warrant nga giluwatan ni Regional Trial Court Judge Soliver Peras sa Branch 10.

Nasakmit sa kapolisan gikan sa panimalay sa suspetsado mao ang tulo ka medium pack ug duha ka small pack nga shabu ug may kuwarta pa nga P2,500 nga gituohang halin sa ginadiling drugas.

Si Binas midugang nga sukad niadtong Enero hangtud sa Mayo ning tuiga, mikabat na sa 30 ka tawo nga tigpalusot og ilegal nga drugas ang nasikop sa kapolisan ug napasakaan na og kaso ngadto sa korte.

Si Binas midugang nga ilang gipanghingusgan karon ang programa alang sa hingpit nga pagsanta sa mamaligyaay og ginadiling drugas sa dakbayan sa Talisay. – Brenda D. Batuto (BANAT NEWS)