Masakiton ipatan-aw una sa health center

CEBU, Philippines – Nabalaka si Lahug barangay captain Mary Ann delos Santos sa gihimong lakang sa kagamhanan sa dakbayan sa Sugbu, pagdili na sa mga masakiton nga direktang ma-admit diha sa Cebu City Medical Center (CCMC).

Buot sa City government nga ang pasyente adto una magpahiling sa City Health Department o dili ba hinuon sa Barangay Health Centers aron maoy morekomendar kun angayan ba silang ipa-admit sa tambalanan.

Tuyo sa kagamhanan sa dakbayan nga mapaluagan ang CCMC ug dili mahan-ukan sa mga pasyenteng duna lay minor complaints nga makaya ra sa mga barangay health centers.

 Apan alang kang delos Santos, hinanggaw ang nahisgutang lakang sa City government tungod kay giingong walay kapabilidad ang kadaghanan sa mga barangay health center sa dakbayan pag-atiman sa mga masakiton.

“Susiha kuno nang mga health centers nato kung equipped ba na sa first aid, ang uban diha wala gani bisan gapas, unya ang anaa diha mga barangay health workers ra sab, kung naa may doktor dili pud kanunay, giunsa man na nila pagkwenta,” sumala ni delos Santos.

Tungod niini, nabalaka ang kapitan nga mosamot unyang magkalisod-lisod ang mga kabus sa siyudad kung masakit tungod kay dili na dawaton sa CCMC nga magpa-admit kung walay rekomendasyon sa city health o sa barangay health centers.

“Unsa goy kapasidad anang mga barangay health worker nato pag-ila sa usa ka masakiton nga nataptan diay og dengue o A(H1N1) ba hinuon, hilanat man gihapon na, patyon una nila ang pasyente una ipa-admit sa CCMC,” dugang pamahayag sa kapitan.

Sugyot ni delos Santos ngadto sa City government nga palambuon niini ang serbisyo sa CCMC tungod kay kini lang ang bugtong tambalanan sa dakbayan nga giingong dangpanan sa kabus sa siyudad.

Ang kapitan nga nakig-atbang ug napildi ni Mayor Tomas Osmeña sa nakalabay nga piniliay miingon nga gikinahanglan sa nahisgutang tambalanan nga magahinan sa kagamhanan og igong pundo aron walay pasyente nga mabalibaran.

Si Osmeña una nang naglaraw nga pasirad-an ang maong tambalanan tungod sa kadismaya niini sa gipakitang serbisyo sa maong tambalanan. – BANAT NEWS