Gipusil buko-buko buslot

CEBU, Philippines – Nabuslot ang bukobuko sa 24 anyos nga lalaki dihang gipareglahan kini og pusil sa gawas sa koral sa diskohan didto sa barangay Okoy, lungsod sa Sta Fe ,isla sa Bantayan kagahapon sa alas 4:05 sa kaadlawon.

Ang biktima mao si John Escaran, 24, ulitawo, nga taga Okoy, samtang ang suspek mao usab si Joseph Jiduquio, hingkod, ulitawo, nga taga barangay Maricaban sakop sa maong lungsod.

Si SPOI Rolando Bastidea sa Sta. Fe Police Station mibutyag sa Banat News nga samtang nagbarog- barog ang biktima sa gawas sa koral sa diskohan nga nagtan-aw sa nanayaw, kalit lang giduol sa suspek ug sa walay igong hinungdan gipusil kini makatulo ka higayon.

Usa sa mga samad sa biktima mao ang sa buko -buko nga milapos sa iyang tiyan hinungdan nga gihatod dayon kini ngadto sa   Bantayan District Hospital aron malibre.

Samtang ang suspek boluntaryo usab nga mitahan ngadto sa kapolisan diin kini nagtingkagol na karon sa prisohan.

Nasuta sa kapolisan   nga parigla ra ang hinungdan sa maong pagpamusil kay lasbag ang suspek. – Darrel A. Carumba (BANAT NEWS)