Batan-on gikulata sa tanod

CEBU, Philippines – Mga tanod sa barangay Tanke ang gipasanginlang namun-og og usa ka menor de edad nga giingong naghantak ug naghingos og rugby niadtong Huwebes sa gabii diha sa nahisgutang barangay.

Ang inahan sa 17-anyos mireklamo sa Talisay City Police Station ug nagpa-blotter sa nahisgutang hitabo.

Ang inahan mipasangil sa tanod nga nagduwa ra ang iyang anak ug dihang nakit-an sa mga tanod gigukod hinungdan nga midagan ang bata ug   nagunitan siya sa usa sa mga tanod nga giilang si Elizardo Labajo.

Si Labajo dihang nahinabi sa Banat News kagahapon miangkong nahapakan niya sa tiyan makaduha ang bata tungod sa iyang kapungot kay gibugal-bugalan lang sila niini ug hapit siya atakeha sa kakutas og gukod sa maong batan-on.

Matud ni Labajo nga nakadawat sila og taho nga dunay mga menor nga naghantak unya naghingos og rugby sa bakanteng lote atbang sa balay ni Kapitan Perla Cabanes hinungdan nga ilaha kining girespondehan.

Pag-abot sa mga tanod ang nahisgutang mga menor nag-alibwag og panagan apan ang reklamante wala dayon modagan sanglit nanghipos pa kini sa mga sensilyo nga gipusta sa hantak.

Si Labajo mipasangil nga samtang naghingos og rugby ang bata gihiwi-hiwi-an siya niini ug giikid-ikiran sa sampot ug misenyas nga pagukoron siya, diha na nila kini maapsi sa South Coastal Road sa habig sa Tanke.

Giangkon ni Labajo nga iyang nakasab-an ang maong bata ug nahapak sa tiyan ug gidala ngadto sa iyang mga ginikanan ug iyahang gipangasab-an ang naulahi gumikan sa pagpabaya sa ilang anak.

Matud ni Labajo nga dalhon unta nila ang menor sa barangay hall apan midagan kini, ang mga ginikanan mipasalig nga sila nay modala niini ngadto sa barangay hall apan wala kini mobutho ug adto hinuon misumbong sa kapolisan. – BANAT NEWS