Koreano milayat sa patrol vehicle

CEBU, Philippines – Hubog nga Koreano nabalian sa iyang tiil human milayat sa mobile patrol sa kapolisan sa Mandaue didto sa Subangdaku, dakbayan sa Mandaue human sa gihimong liquor test niini sa usa ka tambalanan sa milabay’ng gabii.

Ang miambak mao si Kyun Taek Lee, 28, ulitawo usa ka Korean national nga kasamtangang nagpuyo sa dalan Cabahug barangay Mabolo dakbayan sa Sugbu. Sa nasayran sa Banat News si Kyun gisikop sa kapolisan gumikan kay misibat kini atol sa checkpoint nga gihimo sa station 2 sa kapolisan sa MCPO mga alas 9:45 sa milabay’ng gabii.

Sa dihang nahitabo ang ginukdanay sa mobile patrol ug ang Koreano nasikop kini ug nasuta nga way lisensiya nga dala si Kyun ug hubog usab kini nga nagmaneho sa iyang sakyanan. Gumikan niini gidala si Kyun sa kapolisan sa usa ka tambalanan alang sa usa ka liquor test apan sa dihang misakay na kini sa mobile patrol mikisikisi kini ug misukol sa kapolisan ug sa dihang nakakita og higayon sa pag-ambak, milayat kini sa maong patrol car.

Si Kyun gidala sa Chong Hua Hospital ug kasamtangang giatiman sa mga mananambal diin gibantayan usab kini sa kapolisan sa dakbayan sa Mandaue aron dili kini maka-eskapo ug pasakaan og kaso base sa salaod nga iyang nahimo. – Romeo Limpangog ug Bong Soriano (BANAT NEWS)