Polis nga napugahan girelibohan

CEBU, Philippines – Girelibuhan sugod kagahapon ang polis nga napugahan og piniriso bisan pa man og nadakpan og balik ang naka-eskapo nga priso didto sa Danao Police Station sa siyudad sa Danao. Matud ni SPOI Allan Muñoz, imbistigador sa Danao City Police dihang nahinabi sa Banat News nadawat na nila ang order gikan sa Cebu Police Provincial Office (CPPO) nga nagrelibo kang PO2 Wilson Garciano sugod kagahapong adlawa ug gilabay sa Pilar Police Station sa lungsod sa Pilar, isla sa Camotes.

Kini samtang magpadayon ang imbestigasyon batok niya sa maong pagkapuga sa 17 anyos nga piniriso nga gipagawas sa selda aron pakaligoon apan nalingaw kini og tan-aw og salida sa telebisyon hinungdan nga nakahigayon og eskapo ang maong piniriso nga nag-atubang og kasong robbery.

Matud ni SPOI Munoz si PO3 Arnulfo Yangan kanhi nadestino sa alert team maoy gihulip kang PO2 Garciano isip jailguard ug nagpabilin ang karelibo niini nga si SPOI Vicente Manulat. Matud ni SPOI Munoz ang maong piniriso nadakpan nila og balik didto motago sa silingan niini sa barangay Tuburan Sur human dunay nagpailang concerned citizen ang mitawag nila sa telepono ug nagpahibalo sa nahimutangan sa suspek. Daling miresponde ang grupo nga gipangulohan ni SPO4 Alfredo Tapia ug nadakpan gyud nila og balik ang maong pugante sa alas 11 sa buntag niadtong Huwebes. – Darrel Carumba (BANAT NEWS)