Kargador giluba namatay

CEBU, Philippines – Namatay ang usa ka kargador human kini lubaa sa giutangan sa iyang asawa didto sa merkado publiko sa lungsod sa Liloan kagahapon sa buntag.

Ang biktima mao si Dennis Aliposo, 32, minyo, nga taga Poblacion, lungsod sa Liloan, ug usa ka kargador og utanon, samtang ang suspetsado nailhan usab nga si Rolando Solasola, 21, ulitawo kasamtangang nagpuyo sa Liloan.

Nasayran sa kapolisan nga sa sayo pa, naningil ang suspetsado sa utang sa asawa sa biktima, apan giligid kini og kasaba sa asawa sa biktima.

Pagkataudtaod mibalik si Solasola nga hubog ug nangita sa asawa ni Aliposo apan ang misugat kaniya mao ang biktima.

Nagkalalis dayon ang suspetsado ug ang biktima ug dihang nakabsan na sa katarungan gilanit nalang sa suspetsado ang iyang duha ka kutsilyo ug gihansak kini sa nagkalainlaing bahin sa lawas sa biktima nga maoy hinungdan sa kamatayon sa naulahi.

Sa pagkakaron nagtingkagol na ang suspetsado sa prisohan sa Liloan Police Station. – Bong Soriano (BANAT NEWS)