Killer ni Osorio ginganlan

CEBU, Philippines – Gikumpirmar sa kadagkuan sa kapulisan sa dakbayan sa Sugbu nga sila si Allan Senogat ug Lyndon Horandoy mao gyuy responsable sa pagpusil patay kang Assistant City Prosecutor Patrick Brian Osorio niadtong Enero 6 ning tuiga.

Si Sr. Supt. Patrocinio Comendador ang hepe sa kapulisan sa dakbayan sa Sugbu human usab ang prosecution ang nakakita’g ‘probable cause’ batok na sa mga akusado.

Nunot niini nanghinaot si Comendador makapagawas gilayon og warrant of arrest ang korte batok nilang Senogat ug Horandoy human isang-at sa korte kagahapong adlawa ang kasong murder pagpatay kang Osorio.

Samtang gipasabot niini nga ang isyu sa technicality labot na sa pagsul-ob og helmet sa mga akusado adto nalang unya nila ipasabot inig sugod sa husay sa korte, apan masaligon siyang lig-on gyud ang kasong ilaha karong gipasaka gumikan sa mga saksing nakasuporta sa mga ebidensyang ilang nakuha.

Wala usab sila magtoo nga adunay personal nga motibo ang mga saksi batok sa mga akusado tungod kay dili usab nila kini kaila ug wala usab silay mga kasuko niini.

Dugang pa niini nga ang saksi makadaghan higayon nilang gipabalik-balik sa pagpatan-aw sa mga akusado atubangan mismo sa pamilyang Osorio ug makadaghang higayon gyud nila kining gitumbok hinungdan nga kumbinsido sila nga mao na kining duha nga nagsakay sa motorsiklo.

Si Osorio gi-ambush patay niadtong bulan sa Enero diha sa Gochan Village sa duha ka mga lalaking nagsuot og helmet nga nagmotorsiklo. – Guam Logroño (BANAT NEWS)