Suspek sa tulis nasikop

CEBU, Philippines – Nasikop sa kapolisan sa Talisay sa miaging kaadlawon ang usa sa mga suspetsadong tulisan nga mitulis ug mipusil patay sa usa ka 20-anyos nga nursing student didto sa Victoria Village, barangay Tabunok, dakbayan sa Talisay sa miaging adlaw.

Ang suspetsado giila sa mga polis nga si Jessie Largo, 19- taga sitio Bahadas, barangay Tabunok kinsa nasakmitan og usa ka kalibre .38 revolver nga may upat ka buhing bala nila ni PO2 Roelito Tano ug PO1 Jundave David.

Ang nahisgutang suspetsado nasikop human tulisa ug patya niini si   Dennis Krisstofer Bago usa ka nursing student sa Cebu Normal University.

Si Superintendent Henry Binas, hepe sa Talisay City Police Station sa pakighinabi niini sa Banat News nagkanayon nga sa sayo pa nakadawat sila og impormasyon kalabot sa giingong pagkalambigit ni Largo sa pagtulis ug pagpatay kang Bago.

Busa ilang gipatawag ang amahan ni Bago ug nakig-istorya kini sa suspetsado.

Si Largo mitug-an ngadto sa amahan ni Bago sa mga mitulis ug mipatay sa anak niini niadtong Domingo sa gabii.

Matud pa ni Largo nga siya gyu'y gisultihan ni Jun-Jun niadtong Lunes samtang nag-inom sila didto sa basketball court sa Bahadas nga siya (Jun-Jun) maoy mitulis kang Bago ug dihang wala ihatag dayon sa biktima ang iyang cell phone, iya (JunJun) kining gipusil patay. – BANAT NEWS