Tungod sa knapsack 'Kawatan' nadakpan sa sundalo

CEBU, Philippines – Usa ka suspetsadong kawatan ang nasikop sa usa ka sakop sa Philippine Air Force niadtong Miyerkules sa buntag diha sa barangay Linao, dakbayan sa Talisay gumikan lang sa knapsack nga gidala-dala sa suspek.

Gidemalas ang gipasanginlang kawatan nga si Leonardo “Jun-Jun” Rondina, taga sitio Inajada, barangay Linao sa nahisgutang siyudad human mamay-ungi ni Capt. Aldrin Gonzales Mangoraban, taga Ward 3, barangay Poblacion, lungsod sa Minglanilla ang iyang knapsack nga gidala-dala sa suspek.

Ang imbestigador sa Talisay City Police Station nga si PO2 Keyserling Gorosin III sa pakighinabi niini sa Banat News kagahapon nagkanayon nga ang maong knapsack kabahin sa mga gamit nga gikawat sa panimalay sa opisyal niadtong milabay’ng tuig.

Gikatahong gisulod ang balay sa biktima niadtong milabay’ng tuig nga diin gawas sa maong knapsack nga sudlanan og laptop nadala usab ang ball ring (class ring niini sa Philippine Military Academy); wedding ring sa iyang asawa ug digital camera.

Niadtong Miyerkules sa buntag samtang si Mangoraban sakay sa iyang sakyanan paingon sa dakbayan sa Sugbo nakabantay kang Rondina nagbarog daplin sa dalan diha sa barangay Linao.

Gumikan kay kaparehas gyud kaayo og dagway sa nakawat nga knapsack (imported ni nga bag) ang gisambilay ni Rondina giduol kini ni Mangoraban ug gipangutana kun diin niya kini makuha.

Apan nabantayan dayon ni Mangoraban nga dunay nagbagal sa hawak ni Rondina hinungdan nga iyaha kini dayong gikuptan ug mitawag sa Talisay City Police Station ug nangayo og ayuda sa mga polis.

Gikuha ni Mangoraban kang Rondina ang usa ka .22 kalibreng revolver nga dunay walo ka buhing bala ug dihang gipangitaan kini og dokumento sa maong armas wala kini napakita hinungdan nga iya kining giaresto.

Si Gorosin nagkanayon dihang ilang giyabo ang sulod sa maong knapsack lakip sa natagak ang usa ka gamay’ng paketeng dunay sulod nga gituohang shabu.

Kasong kalapasan sa Akta Republika 8294 kon “illegal possession of firearms” ug paghupot og ginadiling drugas ang gipasaka batok sa suspetsado.

Si Gorosin midugang nga si Rondina ang miangkon ngadto kang Mangoraban nga usa siya sa milungkab sa balay niini ug ang digital camera nga ilang nakuha ang ilang giprenda sa usa sa mga ahensiya diha sa barangay Tabunok, Talisay. – Brenda Batuto (BANAT NEWS)