CEBU, Philippines – Sugdan na karung semanaha sa Maritime Industry Authority (MARINA)-7 ang imbestigasyon sa tag-iya sa nalunod nga motor-banca sa Hilotongan channel sa lungsod sa Cordova atol nga gikuso-kuso sa dagkong bawod ug hangin tungod sa bagyong Feria niadtong Martes.
Si Marina-7 Director Glenn Cabanez mimando dayon og dinaliang imbestigasyon pagtino kun rehistrado ba ang maong motor-banca nga gisakyan og katorse ka pasahero apil na ang tripulante gikan sa lalawigan sa Bohol.
Matud ni Cabanez sukit-sukiton sab nila ang tag-iya kun nganong gipaabangan ang maong motor-banca isip pasaheroan nga unta usa man kini ka panagatan.
Matud niya nga ilang pahamtangan og silot ang tag-iya kun dili kini makahatag og hustong katin-awan sa himuon nilang imbestigasyon.
Ang motorbanca nga M/V Jun-Jun Dos nalunod sa Hilotongan Channel human gihapak sa kusog nga bawod dala sa bagyong Feria.
Sa iyang bahin si Coast guard district Central Eastern Visayas commander nga si Anelito Gabisan nagkanayon nga ila usab susihon ang posibleng tulobagon sa tag-iya sa maong motor-banca nga nipaabang sa napulo ka mga pasahero.
Subay sa report gi-abangan og pasahero gikan sa Bohol ang maong motor banca paingon sa Cordova. – Rey Pasaporte (BANAT NEWS)