CEBU, Philippines – Usa ka 17-anyos nga detainee sa Danao City Police Station sa siyudad sa Danao ang nakaeskapo niadtong Miyerkules sa alas 7:55 sa gabii human malipat ang gwardiyang giingong nalingaw pagtan-aw og salida sa telebisyon samtang nagpakaaron-ingnong naligo ang dinakpan.
Ang nakapugang piniriso lumad nga taga Alicia sa lalawigan sa Bohol ug kasamtangang nagpuyo sa Tuburan Sur siyudad sa Danao nga nag-atubang og kasong robbery.
Giingong plano sa maong batan-on nga makatambong sa ilang family reunion karong Hunyo 30 sa Bohol.
Matud pang Supt. Elmer Lim, hepe sa Danao City Police dihang gikahinabi sa Banat News nga ‘escape artist’ na ang maong bilanggo sanglit walo na ka higayon kining nakaeskapo sa bilanggoan, lima niini sa Rehabilitation Center for Youth sa Candabong, Argao ug ikatulo na kini karong pag-eskapo niya sa Danao detention cell.
Ang maong bilanggo nadakpan ra hinuon human sa 16 ka oras nga pagpangita kaniya sa kapolisan diha sa usa ka hilit nga dapit sa barangay Tuburan Sur sa Danao.
Matud pa ni SPO4 Teofilo Deguilmo sa Danao City Police dihang nahinabi sa Banat News giingong gipagawas sa karsel ang maong piniriso niadtong higayuna aron pakaliguon sulod sa banyo sa maong presinto.
Apan ang jailer nga si PO2 Wilson Garciano kinsa nagtan-aw og telebisyon wala makabantay nga dunay laing tuyo ang suspek ug daling midagan palayo sa ngitngit nga bahin sa maong presinto.
Matud pang Lim nga nakuptan pa unta nila kini atol sa komosyon apan nakaipsot gyud ug daling nakadagan sa ngitngit nga bahin sa lugar ug wala na gyud nila makit-i.
Dugang pa ni SPO4 Deguilmo, nasulod kini niadto pang petsa 18 ning bulana tungod sa kasong pagpanulis.
Dunay report nga makadaghan na kini nga magsulod-gawas lang sa prisohan tungod sa mga dautang buhat niini sa maong lugar.
Matud ni SPO4 Deguilmo nga naglisod sab sila sa pagtuo sa pangangkon sa suspek nga minor de edad pa kini sanglit wala man gyud kini makapakita og birth certificate.
Si Sr. Supt. Jesus Gacquing, director sa Cebu Provincial Police Office wala mahimuot sa pag-eskapo sa maong priso ug mimandong did-an na pagtan-aw og mga soap opera ug uban pang pasundayag sa telebisyon ang mga polis sa mga police stations.
Tugutan lang sila makatan-aw niini kun balita ang palabas isip kabahin sa dugang impormasyong ilang makuha ug dili ang mga palabas nga walay mga hinungdan ug kalabutan sa ilang trabaho isip polis. Nunot niini, si Gacquing mimando og imbestigasyon batok ni Garciano ug kang Supt. Lim kabahin sa maong hitabo.
Si Lim miangkong dunay telebisyon sa ilang buhatan apan dili kini ang tinuoray’ng hinungdan nga nakaeskapo ang suspek tungod kay niadtong tungura daghan silang giatimang reklamo ug nalipat ra gyud ang gwardiya. – BANAT NEWS