Killer ni PO2 Racaza motahan

CEBU, Philippines – Ang suspetsadong mipusil patay kang PO2 Benjamin Racaza nagplanong mosurender apan dili ngadto sa kapolisan sa dakbayan sa Talisay.

Nasayran sa kapolisan nga si Anthony “Tonton” Aves ang suspetsadong mipatay kang Racaza gibati na og kabalaka tungod kay ang iyang mga hulagway gipakatap na sa mga police station hinungdan nga nagplano siyang motahan sa iyang kaugalingon.

Si Superintendent Henry Binas, hepe sa Talisay City Police Station sa pakighinabi sa Banat News kagahapon mibutyag nga duna siya'y nadawat nga tawag (apan wala ibutyag niini ang ngalan sa tawo nga mitawag kaniya) kinsa nagsusi bahin sa proseso sa pagsurender tungod kay gusto na ni Aves nga mosurender.

Matud ni Binas nga katungod usab sa suspetsado kung asa nga police unit siyang gusto nga mosurender kun wala siya'y gusto didto sa Talisay police.

Ang kapolisan wala dayon moduso sa kaso tungod kay naghuwat sila sa pagsurender ni Aves. – Brenda D. Batuto (BANAT NEWS)