Magsuon gipamusil sa ilang ig-agaw

CEBU, Philippines – Usa ang patay ug kritikal ang kahimtang sa laing usa human gibanhigan ug gipamusil ang duha ka magsuon sa ilang mga ig-agaw samtang sakay sa   motorsiklo paingon na untang mopauli pag-abot sa usa ka taytayan didto sa Sitio Langub, barangay Sayaw, lungsod sa Sibonga niadtong Martes sa alas 5 sa hapon.

Ang biktima nga namatay mao si Ramil Casilac Navares, 23, ulitawo ug ang kritikal usab ang kahimtang sa manghod niini nga si Rynloui Casilac Navares, 22, pulos molupyo sa nahisgutang lugar.

Samtang ang gipasanginlang namanhig mao ra usab ang ilang mga ig-agaw nga sila si Roel Casilac, 21, ulitawo, Agrifino Casilac, ug Torciano Ceronay Jr., ulitawo pulos mga molupyo sa nahisgutang lugar.

Matud ni SPO4 Rodilito Carillo sa Sibonga Police Station sa dihang nahinabi sa Banat News subay sa blotter nga gibasehan nga ang mga biktima gikan miduwa og basketball sa Sitio Langub ug paingon na unta kining mopauli sakay sa ilang motorsiklo.

Apan pag-abot nila sa taytayan sa maong lugar deretso kining gipamusil sa nag-atang nang daan nga mga suspek gamit ang wala pa matino nga kalibre sa armas ug ang biktima nga si Rynloui nga maoy nagmaneho sa motor naigo kilid sa iyang lawas ug kamot samtang ang maguwang nga angkas maayong pagka-igo sa sentro sa dughan nga milapos sa bukobuko ug natagak sa motor ug patay diha diha.

Ang mga suspek naglumbaanay og sibat pahilayo samtang ang biktimang si Rynloui gidali og dala sa Deiparine Medical Clinic sa lungsod apan tungod sa seryoso nga kahimtang niini gibalhin kini sa tambalanan dinhi sa dakbayan sa Sugbo.

Subay sa inisyal nga imbistigasyon nila ni SPO4 Carillo nga personal nga kasungi-an ang motibo sa krimen sanglit nagkabangi ang pamilya sa biktima ug suspek kabahin sa ilang kabilin nga yuta. – Darrel A. Carumba (BANAT NEWS)