UCLM 'quarantine' gidayeg sa Mandaue

CEBU, Philippines – Gidayeg sa mga kadagkuan sa Mandaue City Health ang gihimo sa University of Cebu - Lapulapu Mandaue kon UCLM Campus sa pag- quarantine sa ilang mga tinun-an human dunay tulo nga nataptan sa Influenza A(H1N1) virus sa milabay'ng semana.

Si Mandaue City Health Officer Dr. Edna Seno nagkanayon nga hangtud di pa ma-clear ang ubang mga giobserbahang dunay mga sintomas di pa dayon makunsiderar nga luwas ang maong mga tinun-an nga makigsagol sa ubang mga tawo.

Hangtod ning pagsulat sa balita ang 600 ka mga maritime scholars sa Norwegian Ship Owners Association nagpabilin pa gihapon sa ilang dormitoryo.

Pabilin pang gipaabot ang resulta sa ‘swab sample’ examination sa 21 ka mga tinun-ang bag-uhay lang giobserbahan human magpakita og sintomas sa maong sakit. – Bong Soriano (BANAT NEWS)