CEBU, Philippines – Negatibo sa gun powder residue ang resulta sa paraffin test ang mga kamot sa duha ka security guards nga gipasanginlang maoy mipusil patay sa magtiayong retired nga koronel Francisco Arada ug abogadang si Mary Jane Arada niadtong Sabado sa gabii didto na sa barangay Cantao-an lungsod sa Naga.
Kini maoy gipahibalo ni Sr. Supt. Melvin Buenafe, hepe sa Regional Intelligence Division (RID) kinsa mao usab ang task force commander sa “Task Force Arada” base usab sa gipagawas nga resulta kagahapong adlawa sa Philippine National Police (PNP) Crime Laboratory 7.
Apan si Buenafe, nagkanayon nga ang resulta dili hinuon kini conclusive sanglit di kini magamit isip ebidensya ngadto sa korte hinungdan nga wala sila mabalaka niini.
Matud pa niya posibleng migamit og gloves o ba kaha kusog kaayo ang hangin atol sa pagpamusil ug napalid ang pulbura palayo sa mga kamot sa mamumuno.
Apan dako ang iyang pagsalig nga makabarog ang kasong ilang ipasaka batok nila ni Rodynas Danding ug Rachel Omawan particular na ang “dying declaration” ni Atty. Arada nga nakasulti pa sa kapolisan kung si kinsa ang mga mamumuno.
Sa pagkakaron gitutukan na sa ilang imbestigasyon pagtumbok sa mastermind sa maong krimen kini tungod kay nagtoo silang duna gyuy lain pang nagpaluyong motibo sa pagpatay sa duha. – BANAT NEWS