Depektosong school buildings gisusi

CEBU, Philippines – Dunay nakitang depekto ang inspection team sa Cebu City Schools Division nga misusi sa gireklamong school building diha sa Talamban Elementary School.

Matud ni Engr. Nick Meniamen, hepe sa mga inspection team, nga dili kasarangan ang ilang nakita nga mga liki sa bongbong sa bag-ong gitukod nga school building ilabi na ang sa ikaupat nga andana niini.

Ang nakapagrabe gyud matud ni Meniamen mao nga bisan kun ila lang iduot-duot og hinay, matay-og kini gumikan sa kahuyang.

Dili pa hinuon makasulti ang engineer kung substandard ba ang pagtrabaho niini sa Maningo Enterprises nga maoy sub-contractor sa maong building. 

Kagahapon gitakda sa grupo ni Meniamen nga bakbakon ang bongbong sa usa ka lawak sa ikaupat nga andana aron sutaon kun may kabilya ba kini kay nasayran ni Meniamen base sa report nga iyang nadawat gikan sa mga magtutudlo nga wala diay kuno kini taori og kabilya sa kontraktor.

Gitataw hinuon ni Meniamen nga dili madisturbo ang klase sa mga tinun-an sa tulo ka classroom sa ikaupat nga andana bisan kun anaa sila nga mo-inspection niini.

Nasayran nga mokapin sa usa ka gatos ka mga tinun-an sa grade 6 ang nag-ukopar sa tulo ka classroom sa ikaupat nga andana sa maong edipisyo.

Apan sa bahin ni City Education Consultant Joy Augustus Young kini nagkanayon nga angayan una nga biyaan ang mga classroom sa ikaupat nga andana aron dili masugamak ang mga kabataan sa kabalaka nga mabungkag kining buildinga.

Hangtud nga dili matino nga luwas klasehan sa mga tinun-an ang tulo ka classroom, dili kini maayong gamiton, matud pa ni Young. – Elly Bolonos (BANAT NEWS)