Namuhat og pekeng permit gidakop

CEBU, Philippines – Nagpatabang sa mga sakop sa Barangay Intelligence Network (BIN) nga nadestino sa Cebu City Hall ang usa ka lumolupyo sa barangay Quiot aron sa pagpadakop sa usa ka fixer.

Labihang laguta sa usa ka Santos Logronio, dihang nasango sa Office of the Building Official (OBO) ang iyang electrical permit application.

Sa pagsusi ni Logronio sa OBO nasuta niini nga mini ang iyang building permit nga maoy rekisito sa pagkuha usab og electrical permit.

Nasayran nga ang building permit application number ni Logronio gipanag-iya sa usa ka Fernando Miñoza sa barangay Talamban.

Butang nga nakapadismaya sa biktima hinungdan nga kini nagpatabang sa mga sakop sa BIN pagpangita sa fixer nga naila nga usa ka Dandy Lolong.

Dihang nakit-an niini ang suspetsado dali kining gihatod sa Compaq Police Station atbang sa City Hall nga gi-turnover ra usab ngadto sa Waterfront Police Station.

Giangkon ni Lolong nga iyang gimaniobra ang paghikay sa aplikasyon ni Logronio pinaagi sa pagpa-scan sa pirma sa mga opisyal sa OBO.

Matud sa suspetsado nga kini iyang gihimo aron lang makatabang sa biktima nga gusto nga matauran og suga ang gitukod niining pinuy-anan.

Apan karon nga nabulilyaso ang transaksyon ni Lolong gusto sa biktima nga mauli pagbalik ang iyang nahatag niini nga kwarta.

Andam hinuong mobayad si Lolong sa gipangayo ni Logronio nga mokabat og P10,500 atol sa ilang pag-atubang sa presinto sa kapulisan kagahapong adlawa.

Apan miingon si Logronio nga kung dili mahatag niini ang kwarta sulod sa pipila ka oras nga iyang gihatag nga tagal kagahapon, kini iyang ipapriso ug pasakaan og kaso.

Sa iyang bahin, ang assistant building official sa siyudad nga si Engineer Josefa Ylanan mibutyag nga lisod nang makalusot sa ilang buhatan ang mini nga electrical permit application.

Kini tungod kay duna na sila'y kasabutan tali sa Visayan Electric Company nga ibalik sa ilang buhatan ang application kun magdoble na ang permit number niini.

Wala hinuon matino kung mosang-at ba usab og kaso ang OBO batok sa fixer nga miangkong magtulo ka tuig na sa iyang trabaho. – BANAT NEWS