Tinun-an sa nursing gipatay

CEBU, Philippines – Patay diha-diha ang usa ka graduating sa kursong nursing sa dihang gipusil samtang gikan misimba ug namalit og chocolate sa usa ka tindahan ug paingon na untang mopauli sa ilang panimalay sa Victoria Village, Tabunok syudad sa Talisay pasado alas 8 sa miaging gabie.

Si Dennis Kristoffer Bago, 20, tinun-an sa Cebu Normal University, gipusil dili layo sa iyang gipuy-an sa wala mailhing duha ka mamumuno nga nagsakay og motor nga kolor asul.

Matud pa ni SPO3 Cleofas Bonjoc, desk officer sa Talisay City Police Station   sa pakighinabi sa Banat News nga samtang   nagbaklay paingon sa ilang panimalay kalit lang kini nga gipusil sa mamumuno.

Naigo kini sa iyang wala nga bahin sa iyang dughan nga maoy gituohan nga maoy hinungdan sa hinanaling kamatayon niini.

Gisuwayan unta sa pagpadala sa Talisay District Hospital ang batan-on apan gideklarar kini nga dead on arrival sa mga doctor.

Si Insp. Henry Biñas, hepe sa Talisay Police Station nagkanayon sa pakighinabi sa Banat News nga aduna silay gitan-aw nga duha ka posibleng motibo sa pagpusil patay sa biktima.

Usa niini mao ang posibling adunay kalambigitan ang biktima sa mga fraternity   apan gibutyag   sa kabanay sa biktima nga bisan usa sa mga grupo nga nabutyag ni Biñas wala nahalambigit ang biktima.

Samtang ang ikaduha niini mao ang anggulo nga pagpanulis kini tungod kay aduna silay nadawat nga estorya nga nag-text-text ang biktima samtang naglakaw apan ila pa kini nga sutaon kun nagdala ba gyud kini og cellphone tungod kay wala man silay nakuha nga cellphone gikan sa batan-on.

Dugang pa ni Biñas nga aduna silay nakuha nga slug sa lawas sa biktima apan ila pa kini nga sutaon kun unsa nga klase sa kalibre sa armas ang gigamit sa pagpusil.

Gibutyag usab ni Biñas nga adunay nakasaksi nga nag-motor og asol ang namusil apan wa makakuha og plate number. – Lesley Caminade (BANAT NEWS)