13-anyos gipatay sa gang

CEBU, Philippines – Patay nang gideklarar sa mga mananambal ang usa ka 13-anyos nga batang lalaki human kini gitabangan og dunggab sa mga sakop sa gang sa sitio Matumbo barangay Pusok dakbayan sa Lapulapu sa kaadlawon.

Ang biktima mao si Jason Barbon Cueno, 13- anyos ug residente sa sitio Paradise barangay Pajo dakbayan sa Lapulapu, usa ka estudyante sa grade 6 sa Lapulapu City Central School.

Base sa pasiunang imbestigasyon ni SPO3 Rex Ibañez sa Crime Against Persons (Homicide) sa Lapulapu nasayran base sa pamahayag sa usa ka saksi nga minor de edad (ngan di ikabutyag) mibutyag ngadto sa kapolisan nga ang mga suspetsado naila lamang sa ngalan nga Rai-rai, Richard ug Frankly pulos mga sakop sa gang.

Matud pa sa maong saksi nga gikan sa usa ka pasundayag sa live-band ang maong biktima sa sitio Opa, barangay Matumbo dakbayan sa Lapulapu ug sa pagpauli giatangan sa mga suspek ug dayon gitabanga’g dunggab.

Si Cueno nga nakahiagom og ubay-ubay nga samad dinunggaban sa iyang kalawasan gibiyaan sa mga suspetsado dayong pahilayo sa maong dapit.

 Ang mga sakop sa Emergency Rescue Unit Foundation misuway pagdala kaniya sa tambalanan sa Lapulapu City District Hospital apan gideklarar kining patay na.

Ang kapolisan nga miresponde napakyas pagsikop ug pag-ila sa mga responsable apan nakuha gikan sa lugar sa maong krimen ang usa ka bali nga kutsilyo ug usa ka headbond nga kolor pula ug mga tsinelas nga posibleng iya sa mga mamumuno.

Gidudahan ni SPO3 Ibañez nga posibleng adunay kalambigitan sa panagribal sa gang o ba kaha paregla lamang ang motibo sa pagpatay. – Bong Soriano uban sa report ni Romeo Limpangog (BANAT NEWS)