Sixth district dili i-'free-zone' - Gwen

CEBU, Philippines – Wala mosugot si Gobernador Gwendolyn Garcia sa hangyo ni Board Member Victor Maambong sa ikaunom nga distrito sa lalawigan nga ideklarar nga ‘free zone’ ang sixto distrito sa sunod tuig nga piniliay.

Si Garcia misugyot atol sa gipatawag niining tigom sa mga lider sa sixto distrito nga mas maayo nga ihiklin lang una karon ang politika tungod kay layo pa kaayo ang piniliay ug mas maayo nga padayonon lang una ang panerbisyo.

Matud ni board member Maambong nga ang hangyo sa gobernadora maoy butang nga ilang gitahod ug gipaabot nila ang desisyon niini nga ipahibawo kun kinsay opisyal nga mga kandidato sa distrito karong buwan sa Agosto ug Septiyembre.

Gihulagway niya nga husay ug malinawon ang ilang tigom niadtong Sabado didto sa Marco Polo Hotel uban kang Kongresista Nerissa Soon Ruiz.

Midugang si Maambong nga gipatawag ni Gobernador Garcia ang maong tigom aron paghilot sa panagsumpaki nila ni Kongresista Ruiz human iindosar niini si Mandaue City Vice Mayor Carlo Pontico Fortuna sa pagka Kongresista hulip kaniya sa 2010 election.

Giangkon ni Maambong nga sa sinugdanan medyo tensyonado ug gamay ra ang pagbinayloay nila og estorya ni Kongresista Ruiz apan nabugnaw ra kini sa ngadto-ngadto ilabina dihang mipadayag ang gobernador nga sayo pa kaayo nga hisgutan ang politika.

Si Maambong ug Ruiz nagkasungi human giindosar niini si Fortuna kay alang kang Maambong walay konsultasyon kanilang mga lider sa partido sa distrito ang gihimo Ruiz. – BANAT NEWS