Andam moatras kun si Minnie O. modagan sa South

CEBU, Philippines - Andam mosibog sa ilang tinguha pagkakongresista sa habagatang distrito sa siyudad sa Sugbu sila si Konsehal Gerardo Carillo ug Rodrigo Abellanosa kung magpapili ang igsuon ni Mayor Tomas Osmeña nga si Minnie sa nahisgutang posisyon.

Matud ni Carillo nga iyang gihangop ang maong kalamboan kung magpapili man si Minnie apan ang ilang partido gihapon nga Bando Osmeña Pundok Kauswagan (BOPK) maoy modesider kung kinsa ang labing takus sa maong posisyon.

Ang konsehal nga anaa na sa ikatulo ug katapusang termino mipadayag nga siya andam mobalik sa iyang propesyon kung dili mapili sa ilang grupo.

“Abogado man ko, after my term, balik lang ko sa akong profession kay kanang politics para nako dili man gyud na between life and death,” matud ni Carillo.

Sa pikas bahin, gipadayag ni Abellanosa nga siya labaw pang andam nga mopadaplin alang kang Minnie kung kini makahukom nga mokandidato.

Si Abellanosa mismoy mitabang pagkombinsir kang Minnie niining maong posisyon nga panguluhan ang habagatang distrito.

Usa sa mga lider sa oposisyon nga si Jonathan Guardo nahimuot sa pagtumaw karon sa pangalan ni Minnie human nilang Carillo, Abellanosa ug Press Secretary Cerge Remonde.

Ang opposition stalwart nga nagtinguha pagpapili pag-usab sa south district nagtuong naglisod na ang BOPK pagpangita’g ikaatubang kaniya.

“Nagpasabot lang na that the three names nga una nilang gi-float have no match against me kay ni-import pa sila og gikan sa United States,” matud ni Guardo.

Nasayran nga si Minnie tua na nagpuyo sa Amerika apan gikatahong usa gihapon ka rehistradong botante sa barangay Camputhaw sa amihanang distrito sa siyudad.

Apan matud ni City Election Officer Atty. Marchel Sarno nga mahimong i-transfer ni Minnie ang iyang registration ngadto sa south district pagsulbad sa problema. – BANAT NEWS