Managsuong tanod gipatay, laing managsuon tipi sad

CEBU, Philippines - Lima ang patay, duha kanila managsuong tanod sa duha ka insidente sa kagubot sa kalingawan sa lungsod sa Dumanjug ug Balamban niadtong Sabado.

Ang managsuong barangay tanod nga gipatay mao sila si Teofisto Lopez, kinsa nakaangko’g samad pinusilan sa ulo ug Pedro Lopez, nakaangkon samad pinusilan sa tuong bahin sa ilok, samtang ang ikatulong napusilan mao si Jessie Cereneo nga napusilan sa walang dughan, tuong ulo dead-on-arrival pulos taga barangay Tubod-Dugoan.

Ang insidente nahitabo sulod sa usa ka videokihan sa barangay Bulak sa lungsod sa Dumanjug niadtong Sabado sa hapon dihang miabot ang suspek nga si Lope Antiga, alyas Pingot taga barangay Kantolaroy lungsud sa Sibonga ug back-up niining si Tedy Decinan.

Si Insp. Ricardo Nayne, hepe sa Dumanjug Police Station nga gikahinabi sa Banat News nagkanayon nga igo rang nanan-aw ang mga biktima sa maong videokihan dihang miabot ang mga suspek ug mipusil kang Cereneo.

Ang suspek gikatahong nagdumot sa amahan ni Cereneo human sila magkabikil sa bulangan niadtong bulan sa Mayo, ang managsuong tanod nga diha ra duol sa biktima giapil ra pagpusil sa suspek.

Ang mga suspek daling miikyas human sa hitabo samtang nakuha diha sa crime scene ang upat ka mga kabhang sa kalibre .45 nga bala ug usa ka slug.

Samtang laing managsuon ang namatay human gipamusil atol sa nahitabong karambola sa diskohan kagahapon sa alas 3:30 sa kaadlawon sa sitio Sak-Sak barangay Buanoy lungsod sa Balamban.

Si PO3 Rolando Navaro sa Balamban Police Station nga gikahinabi sa Banat News miila sa managsuong nangamatay nga sila si Alfredo Almento, 37, ug Ricardo Almento, 26, wala pa mailhi ang mga mamumuno.

Matud pa ni PO3 Navaro, giingong dunay gibunalan og botelya sa ulo ang wala mailhing higala ni Ricardo diha sulod sa diskohan hinungdan sa pag-ulbo sa karambola ug ginukdanay.

Si Alfredo napusilan sa liog samtang si Ricardo gipusil usab sa tiyan sa grupong ilang gikaaway ug gidala unta sa tambalanan sa dakbayan sa Sugbu apan gi-deklarar kining dead-on-arrival.

Hinuon si PO3 Navaro mitug-an nga duna na sila lead nga gisubay sa maong pagpamusil gumikan kay dunay mga saksing nakaila kanila. – BANAT NEWS