Voting precincts dyutay nalang

CEBU, Philippines - Mas gamay na lang unya ang mga voting precincts sa piniliay sa sunod tuig inig patuman na sa “automated election”.

Kini maoy gibutyag ni Cebu City North District Election Officer Attorney Marchel Sarno kinsa nagkanayon nga 82,000 ka computer ang giandam sa kompaniya nga midaog sa subasta sa pagsuplay niini alang sa umaabot nga election.

Apan basi sa miaging piniliay sa tuig 2007 mikabat sa 250 mil ang tanang presinto nga botaranan sa tibuok nasud

Tungod niini giingong usahon na lang sa Comelec ang matag lima ka presinto nga dunay dili molapas sa usa ka libo ka mga bontante.

Gitataw hinuon ni Sarno nga bisan tuod og daghan na ang mobotar sa usa ka presinto apan mas dali na unya ang pagpili sa mga kandidato kay igo nalang itomon sa lapis o ballpen ang ngalan sa kandidato nga pilion sa botante.

Gawas niini miingon si Sarno nga patas-an usab unya sa Comelec ang oras sa pagbotar gikan sa alas 7:00 sa buntag hangtud na sa alas 6:00 sa gabii busa puwerting gyung hapsaya intawon sa dagan sa maong piniliay, matud pa ni Sarno.

Kini sukwahi usab sa gikabalak-an ni Kongresista Pablo Garcia nga gubot ug dili magkadimao ang umaabot nga election ilabi na kun mangagusbat ang mga computer sa Comelec. – BANAT NEWS