Hinabang sa street children gihunong

CEBU, Philippines - Nasagmuyo si unang ginang Margarita “Margot” Osmeña sa dakbayan sa Sugbo karong hingpit nang gihunong ang hinabang sa gobyerno sa nasud alang sa mga street children.

Si Osmeña kinsa maoy chairperson sa Cebu City Task Force on Street Children (CCTFSC) mibasol sa ubang organisasyon kinsa abusado kaayo ug maoy hinungdan nga giputol sa kagamhanan sa nasud ang ilang hinabang niini ug naangin lang ang CCTFSC.

Apan matud ni Osmeña nga bisan kun dili na sila makadawat og hinabang gikan sa nasudnong kagamhanan, padayon gihapon ang ilang kalihukan alang sa kaayohan sa mga kabataang libudsuroy.

Gibutyag sa unang ginang nga sulod sa 20 ka tuig niyang paghupot sa katungdanan isip tsirman sa CCTFSC, may mga batang nakalampos na sa ilang pagtuon, nakatrabaho na ug ang uban pamilyado na, gumikan sa hinabang sa kagamhanan sa dakbayan sa Sugbo kanila.

Matag tuig ang organisasyon walay hunong sa pagtabang sa mga bata kinsa gustong mohuman sa ilang pagtuon sa kolehiyo. – BANAT NEWS