CEBU, Philippines – Gikinahanglan kaayong pahugtan ang seguridad sa duha ka taytayan nga nagdugtong sa Mactan ug Mandaue ,matud pa ni Provincial Board Member Juan Bolo.
Tungod niini giawhag niya ang hingtungdang buhatan nga mao ang Mactan Cebu Bridge Management Board (MCBMB)sa pagpatuman og estriktong panukdanan bisan pa kon may mga camera na nga naa sa maong mga latayanan.
Matud pa ni Bolo nga gikinahanglan sa MCBMB nga mohimog dinaliang pagbansay sa mga guwardiyang sibilyan aron motabang sa kapolisan sa pagbantay sa First Mactan Bridge ug Marcelo Fernan Bridge sumala sa sugyot ni Regional Operation and Plans Division Chief Sr. Supt. Louie Oppus sa PRO-7.
Si Bolo miawhag usab sa mga opisyal sa MCBMB nga ipamonitor sa tigbantay sa maong mga tulay ang mga tawo nga magyampungad sa maong mga lugar ilabina sa panahon sa kagabhion hangtud sa sayong kabuntagon.
Kini tungod kay matud pa ni Bolo nga gihimo na lang hikoganan ang maong mga taytayan sa mga tawong may bug-at nga problema sa ilang kinabuhi.
Dugang pa ni Bolo nga importante kaayo ang kahugot sa seguridad sa maong mga taytayan tungod kay nagsilbi kini nga tourist spot sa mga langyaw ug mga lokal nga mga turista ilabi na ang Marcelo Fernan Bridge nga adunay mini park nga kasuroyan. –Chester Abadilla (BANAT NEWS)