Isdang tinina likayan

CEBU, Philippines – Gipasidan-an sa mga sakop sa hunta probinsyal ang mga konsumedor sa tibuok lalawigan sa Sugbu nga magmatngon sa paliton niining mga isda aron dili mabiktima sa isdang tinina.

Si bokal Juan Bolo sa unang distrito sa lalawigan sa Sugbu nagkanayon nga maghatag og peligro sa lawas sa tawo ang tina kay may kemikal kini nga makahilo.

Ang maong pasidaan gihimo ni Bolo human masikop sa mga otoridad dinhi sa siyudad sa Sugbu ang usa ka lab-asirang Muslim kinsa nasakpang mitina sa hasang sa baligya niya aron lab-as tan-awon bisan kun lata na kaayo ug hapit na madugta.

Gisudlan usab sa maong lab-asira og gagmay'ng mga isda ang tiyan sa baligya niyang isda aron kini dako tan-awon ug bug-at kining timbangon.

Sumala pa ni bokal Bolo nga ang gihimo sa maong lab-asira sa siyudad sa Sugbu posibleng mahitabo usab sa mga kalungsoran sa lalawigan sa Sugbu.

Si Bolo nagkanayon nga pinaagi sa iyang resolusyon, gusto niyang maprotehian ang katawhan gikan sa mga binuang ug tinunto sa mga malditong negosyante nga walay laing tuyo mao ra ang pagpaburot sa ilang ginansya bahala na og mangamatay ang mga tawong makakaon sa ilang produkto.

Giawhag usab ni Bolo ang mga lokal nga opisyal sa tanang kalungsoran sa lalawigan nga hugtan ang pagmonitor sa mga tendera og isda aron dili masubli ang nahitabo sa dakbayan sa Sugbu. – Chester Abadilla (BANAT NEWS)