Kaluwasan sa kabataan sa dalan siguruhon

CEBU, Philippines – Giawhag ni Cebu City Councilor Edgardo Labella ang Cebu City Traffic Operations and Management (Citom) nga higpitan ang pagpatuman sa Revised Traffic Code sa siyudad alang sa kaluwasan sa mga kabataan.

Kini human usab masayod ang konsehal sa report gikan sa United Children’s Fund (Unicef) nga usa ka bata ang mamatay sa nasud matag oras tungod sa aksidente sa kadalanan.

Gawas niini giingong 200 mil usab ka mga bata dinhi sa Pilipinas ang malandig sa tambalanan matag tuig lakip na dinhi sa Sugbu tungod sa disgrasya sa kadalanan.

Gipadayag ni Labella nga usa sa rason nganong dunay mga aksidente partikular ang mga school zone dinhi sa siyudad mamahimong luwas gikan sa disgrasya kung mohinay lang ang dagan sa mga sakyanan.

Laing paagi nga nakita sa konsehal nga maprotihian ang mga bata diha sa kadalanan mao ang paghawan sa mga sidewalks sa mga basura, pagtabon sa mga manhole, pagbadlong sa nagpataka’g parking nga mga sakyanan, paghipos sa mga makililimos ug uban pa.

Labaw sa tanan miingon si Labella mao ang pagpapahawa sa mga sidewalk vendors nga makapalikay na hinoon sa kabataan ug adto na muagi sa karsada.

Tungod niini giawhag usab sa konsehal ang demolition team sa siyudad nga makig-alayon sa ubang ahensya pagpapahawa sa mga manindahay daplin sa kadalanan.

Partikular na niini niadtong duol sa mga tunghaan nga mga school zone sidewalks ingon man ang mga skywalks sa siyudad nga giingong gitindahan na usab sa ubang mga vendors.

Usa ka resolusyon ang ipalabang unya ni Labella nga mag-awhag sa demolition team ug Citom nga himuon kini, kini bisan pa man nga ang Cebu City maoy gideklarar nga labing luwas sa mga tinun-an kumparar sa ubang mga siyudad sa nasud kun aksidente ang hisgutan sumala pa sa pakisusi sa Safe Kids Philippines (SKP).

Nasuta sa SKP nga ubos kaayo ang mga report kabahin sa aksidente sa mga tinun-an dinhi sa dakbayan itandi sa mga siyudad sa Pasay, Parañaque, Olongapo, ug Quezon nga susama ka progresibo sa Cebu.

Nasayran gikan sa SKP nga moabot sa 20 milyones ka mga bata sa nasud ang manglakaw paingon sa ilang eskuwelahan matag adlaw nga naglakip sa kabataan dinhi sa siyudad. – Elly Bolonos (BANAT NEWS)