CEBU, Philippines – Patay nang miabot sa tambalanan ang kagawad sa Barangay Cambaro human kini madasmagi sa usa ka pribadong sakyanan sa dalan Plaridel sa barangay Cambaro dakbayan sa Mandaue kagahapon sa buntag.
Ang biktima mao si Kagawad Gerimias Cortes, 74, residente sa maong dapit samtang laing nadisgrasya mao si Oscar Herosa, 46, residente sa barangay Alang-alang dakbayan sa Mandaue nga usa ka traysikad driver.
Base sa pasiunang imbestigasyon ni PO3 Ramil Mendoza sa traffic division sa dakbayan sa Mandaue nasuta nga usa ka Jun Michael Verga, 22, residente sa barangay Gun-ob dakbayan sa Lapulapu ang nakadasmag sa kagawad kinsa nagmaneho sa usa ka pribadong sakyanan.
Matud pa ni PO3 Mendoza nga nagduka si Verga niadtong tungura base usab sa pamahayag niini samtang nagdagan gibanabanang 60 ngadto sa 70 ka kilometrahe matag oras.
Kini maoy gituohang hinungdan nga wala na kini makakontrolar sa sakyanan sa dihang duol na kini sa mga biktima.
Base sa pipila ka mga saksi nakita nila ni Kon. Cortes nga gikan pang mipakanaog sa motorsiklo sa iyang kapuyo sa daplin sa dalan sa Plaridel St. atbang sa Mandaue Academy dihang kalit nadasmagan ni Verga.
Ang traysikad driver nga si Herosa nadasmagan usab kini apan wala kini magrabehi, human maigo ang duha nalahos ug misampak ang sakyanan ni Verga sa usa ka poste sa maong dapit.
Wala maunsa si Verga, apan si Cortes gideklarar nga dead on arrival sa mga mananambal sa Mandaue City Hospital, si Herosa nga nahiagum lamang sa mga samad ug bun-og sa kalawasan luwas na kini sa makuyaw nga kahimtang.
Si Verga mitahan sa mirespondeng mga polis ug gidala ngadto sa Station 5 ug didto temporaryong gibalhug alang sa dugang imbestigasyon.
Miangkon si Verga nga nakatagpilaw siya samtang nagmaneho sa iyang sakyanan gikan sa dakbayan sa Sugbu samtang pauli na unta sa ilang panimalay.
Ang mga ginikanan ni Verga nga diha usab sa kapolisan mipasalig nga mosagubang sa tanang gastuhanan sa mga nabiktima. – Bong Soriano (BANAT NEWS)