Piskal Rubia nasurpresa sa desisyon

CEBU, Philippines – Gikasurpresa ni Talisay City Prosecutor Marcial Rubia ang pagtugot sa korte nga makabutang og piyansa nga P200 mil sa duha ka counts sa kasong serious illegal detention ang sinagop ni Talisay City Mayor Socrates Fernandez nga si Joavan.

Si Rubia dihang nahinabi sa Banat News miangkong nakalitan sila sa maong kalambuan gumikan kay wala paman sila mahuman og presentar sa tanang mga ebidensya batok kang Joavan ug mga kaubanan.

Apan gipasabot hinuon ni Rubia nga ilang respetuhon ang hukom ni Judge Manuel Patalingjug ug ilaha nalang tun-an ang desisyon uban sa handling prosecutor nga si Benju Lotter Macion alang sa sunod nilang lakang pagduso og motion for reconsideration.

Hinuon masaligon si Rubia nga dili makaapekto sa dagan sa kaso ang pagtugot kang Joavan nga makabutang og piyansa nga naghatag karon niya sa temporaryong kagawasan pending sa husay sa kaso.

Si Joavan ug mga kaubanan nag-atubang og duha ka counts nga kasong serious illegal detention nga gipasaka sa vulcanizing boys, ang mag-agaw nga Winston ug Osbert Abellana ug si Joavan nadakpan sa mga sakop sa NBI sa usa ka Spa sa dakbayan sa Talisay niadtong niaging tuig.

Giklaro hinuon ni Rubia nga wala ni gisabotahe ang maong kaso gumikan kay gihimo nila ang tanan aron mapalig-on ang kiha batok sa anak sa mayor, wala usab magpasabot nga makalingkawas na si Joavan sa maong kaso dugang pa niya. – Chester Abadilla uban sa report ni Darrel Carumba (BANAT NEWS)