Naga police andam mag-police lineup

CEBU, Philippines – Andam ang kapulisan sa lungsod sa Naga nga mopaubos sa police line-up, kini aron paglimpiyo sa ilang pangalan sa mga pasangil nga nangilkil sa usa ka motorista diha sa checkpoint.

Si Supt. Anthony Bagarinao, hepe sa kapulisan sa lungsod nanawag sa buhatan sa Banat News aron sa pagtubag sa maong akusasyon batok sa ilang buhatan.

Matud pa ni Bagarinao nga bukas sila sa imbestigasyon hinungdan nga ilang gi-welcome ang imbestigasyon nga gimando ni Sr. Supt. Jesus Gacquing, hepe sa kapulisan sa Probinsya sa Sugbu.

Gipadayag niini nga mas maayong mopatim-aw ang maong negosyante ug sila sa ilang bahin ang mopaubos sa police line-up, ang reklamante mipasangil nga nagsuot og sibilyan, shorts ug sakay sa “blue jeep” ang tulo ka polis nga mikilkil kaniya og kwarta.

Apan si Bagarinao miklaro nga hagbay pa nga naguba ang blue jeep sa ilang buhatan.

Nasayran nga ang maong negosyante mipasangil nga dili modawat og P300 ang maong mga police tungod kay gusto nilang tag P500 gyud aron aregluhon ang iyang kalapasan sa trapiko. – Guam Logroño (BANAT NEWS)