'Killer' ni osorio nasikop

CEBU, Philippines – Nasikop ang gipasanginlang gunman ni Assistant City Prosecutor Patrick Ian Osorio kagahapon sa kaadlawon uban sa upat ka mga kauban niini sa gipahigayong sunod-sunod nga pagpang-ronda sa joint operations sa mga sakop sa Criminal Investigation and Detection Group (CIDG-7), Regional Mobile Group (RMG-7) ug Regional Intelligence Division (RID-7) diha sa barangay Maghaway, dakbayan sa Talisay.

Si Allan Sinogat, 31, deputy chief tanod sa Maghaway nadakpan pinasikad sa search warrant nga gi-isyu ni Judge Soliver Peras sa Regional Trial Court (RTC) branch 10 gumikan sa paghupot og walay mga lisensyang tag-as nga armas sama sa Colt .45, usa ka magazine sa .45, usa ka homemade shotgun, usa ka de magazine shotgun, 17 ka buhing bala sa .45, tulo ka buhing bala sa shotgun ug usa ka holster sa .45.

Lakip sa nadakpan sa maong joint operation ang mga kaubanang tanod niini nga sila si Felix Abacahan Sr., 54, nakuhaan sa iyang panimalay og usa ka Colt .45, 15 ka mga bala niini, usa ka .22 magnum revolver, ug duha ka magazine sa .45,.Felix Abacahan Jr., 29, nakuhaan usab .357 magnum revolver, unom ka mga bala niini ug duha ka cal.22. Susano Labrador, 45, nga tanod, nakuhaan sa Caspian caliber .45, pito ka mga bala niini ug usa ka magazine. Chief tanod nga si Florencio Labrador, 51, nakuhaan og usa ka M1 Carbine caliber 30, usa ka homemade shotgun, tulo ka magazine sa carbine, ug usa ka bala sa shot gun.

Ang maong operasyon gipanguluhan mismo ni Supt. Ritchie Posadas, assistant regional chief sa CIDG uban sa RMG-7 ug RID mironda sa mga panimalay sa maong mga akusado mga alas 4 sa kaadlawon.

Si Sr. Supt. Ramon Rafael, hepe sa CIDG-7 mibutyag nga ang pagsikop kang Sinogat kabahin kini sa double murder case sa mga suspetsado human mipusil patay kang Kagawad Pedro Delvo ug umagad nga si Alex Murallos niadtong Mayo 29, didto sa Maghaway.

Sumala pa ni Rafael nga nakadawat sila’g reklamo gikan sa mga residente sa nahisgutang dapit nga adunay mga tawong armado ang magsuroy-suroy hinungdan nga ila kining gisusi.

Matud pa niini nga moabot sa duha ka semana ang ilang pag-surveillance sa mga akusado ug ilang nasuta nga duna gyoy mga armas ingon man nasuta usab nga nalambigit kini sa pagpusil patay kang Osorio ug pagpatay kang   Delvo.

Gibutyag niini nga ila pang gisusi ang background sa mga akusado kun tinuoray ba gayud kining mga gun for hire gumikan sa mga reports hinuon gumikan sa kadaghan sa mga armas ug bala nga nakuha gikan sa mga akusado posibling tinuod usab kini.

Subay niini ang dose ka mga klase sa nagkadaiyang armas nga ilang nasakmit sa mga akusado ila pang isumiter sa PNP Crime Laboratory 7 aron mapaubos kini sa ballistic examination kun wala ba kini malambigit og krimen.

Ang akusadong si Sinogat ang hugtanong mihimakak sa maong pasangil nga nalambigit siya sa pagpatay kang Osorio niadtong Enero 6, ning tuiga kini tungod kay diha ra siya sa ilang panimalay sa Maghaway atol sa krimen.

Gani makaduha na usab siya magpa-clear sa iyang pangalan diha sa Homicide Section sa Cebu City Police Office niadtong Enero 30, ug Abril 21, ning tuiga human migawas ang iyang pangalan.

Samtang si CCPO chief Sr. Supt. Patrocinio Comendador miklaro nga andam sila sa ilang buhatan sa pagkooperar sa CIDG-7.

Siya miklaro nga anaa na unya sa CIDG-7 ang pagpamatuod sa ilang mga ebidensiya nga si Sinogat maoy mipatay kang Osorio kini tungod kay sila sa CCPO   adunay gikasabutan sa Cebu City Prosecutor’s Office. – BANAT NEWS